El mga autoridad ya aresta sinco personas, incluido un lider del Moro Islamic Liberation Front (MILF), y ya confisca valor de mas de P1 million droga ilegal na Bangsamoro Autonomous Region in Muslim Mindanao (BARMM), asegun con el Philippine Drug Enforcement Agency (PDEA) del Domingo.
Asegun con el PDEA-BARMM, con el cuatro del sinco suspechao ya aresta na un operacion de compra busto que ya resulta na desmantelada del un cuarto de droga ilegal na Barangay Ambadao, Datu Piang, Maguindanao del Sur, de Sabado.
El PDEA-BARMM ya identifica con el mga arestao suspechao como si alias Dido, el mantenedor de cuatro de droga; alias Jojo; alias Anton; and, alias Jerry.
Asegun con el PDEA-BARMM, ya confisca na desmatelao cuarto de droga valor de P516,800 suspechao shabu, dinero de compra busto, diferentes clase de parafernales de droga ilegal, dos celpons, sinco cuaderno que ya contene lista de transacciones, cortao plastic de cha y tarjetas de indentificacion.
El PDEA-BARMM ya identifica con el arestao lider del MILF como si Dido Akad Lampay con quien ya aresta del Sabado na Barangay Montay, Datu Piang, Maguindanao del Sur.
Un compañero de Lampay, conocido lang como si alias Markay, ya puede escapa cay ya gole ele el presencia del mga autoridad.
Asegun con el PDEA-BARMM, ya confisca na posesion de Lampay valor de P510,000 suspechao shabu, dinero de compra busto, calisificado parafernales de droga ilegal, un rifle M60, un BAR, mga clip y bala.
Asegun con el PDEA-BARMM, con el mga arestao suspechao hay planta el asunto por violacion del Ley Integral de Drogs Peligrosas de 2002.
Asegun con el PDEA-BARMM con el mga suspechao ya aresta por medio de suporta del militar, police, gobierno local, National Bureau of Investigation, y National Intelligence Coordinating Agency. (B. Garcia)