Cinco Personas Privadas de Libertad, o PDL, el ya escapa desde’l carcel provincial na ciudad de Isabela, provincia de Basilan, asegun con mga oficiales del Lunes.
Aquellos quien ya escapa identificao como el mga siguientes: Amar Mohammad de Al-Barka; Teddi Boga de Tipo-Tipo; Ibrahim Badju de Hadji Mohammad Ajul; Mahad Hassan de Sumisip; y, Muad Ahmad de Hadji Mohammad Ajul.
El cinco PDLs ya escapa desde’l carcel provincial mga alas 3 del Domingo tarde na Barangay Sumagdang, ciudad de Isabela City, el capital del provincia de Basilan.
Asegun con Baser Halilulla, el guardia del carcel de servicio durante el hora del incidente, ya habla cay dos personas el ya anda na facilidad de detencion para visita con un PDL.
Sin embargo, cuando ya entra na puerta el dos visita, ya planta sila pusil con Halilulla y ya abre con el celda de detencion librando con cinco PDLs.
El mga personajes del carcel provincial y policia na ciudad de Isabela enseguidas ya conduci operacion de persecucion para recupera con el mga ya escapa preso.
El concentracion del operacion de persecucion amo el todo posible ruta de escapada y otro identificao lugar de interes.
Si Police Colonel Cerrazid Umabong, el director de policia na Basilan, ya alerta con todo unidades del policia y ya ordena conduci operaciones de punto de control para recupera con el cinco fugitivos.
Ya ordena tamen si Umabong el conducida del mejorao operacion de inteligencia para determina si onde ya el mga preso ya escapa. (B. Garcia)