Sinco personas el ya aresta mientras valor de P8.4 million contrabando ya confisca mga autoridad aqui na ciudad de Zamboanga.
Si Police Colonel Alexander Lorenzo, el Zamboanga City Police Office Director, ya habla cay con el contrabando ya confisca na mar del Barangay Maasin, en este ciudad, mga alas 2:39 del Lunes aga.
Asegun con Lorenzo, ta man patrulla el mga personajes del 2nd Zamboanga City Mobile Force Company (2ZCMFC) y Buro de Aduana cuando ya columbra sila con un jungkung que tiene el marka Lautanmas 3 na mar del Maasin.
Asegun con Lorenzo, durante el inspeccion, ya descubri mga personajes del 2ZCMFC y Buro de Aduana cay ta contene el junkung 240 cajon diferente clase de cigarillo que tiene el valor de P8.4 milliones.
Si Lorenzo ya habla cay ya confisca con el mga cigarillo y ya aresta con el sinco tripulantes del jungkung despues que ya falla sila presenta documento del de ila cargamento estaba na Jolo, Sulu.
El sinco arestao tripulantes todo mga residentes del Barangay Mampang, en este ciudad.
Si Lorenzo ya habla cay con el jungkung, cigarillo y sinco tripulantes ya lleva para na quartel del 2ZCMFC para el documentacion y ay entrega na Buro de Aduana para el propio disposicion.
(B. Garcia, photo courtesy of 2nd Zamboanga City Mobile Force Company)Â
