Sinco personas, cuatro de ila “watchlisted” y uno “street-level individual (SLI)”, el ya aresta mga autoridad na separao campaña contra droga ilegal aqui na ciudad de Zamboanga, asegun con el police local del Jueves.
Asegun con Police Colonel Alexander Lorenzo, el Zamboanga City Police Office Director, con el mga arestao personas ya conose como el mga siguientes: Reynold Rojas, 53; Jocelyn Francisco, 49; Nestor Ustalan, 31; Alham Ganih, 37; y, Seikoul Jakiran, 27.
Asegun con Lorenzo, con Rojas, un trabajante de construccion, ya aresta na un campaña contra droga ilegal mga alas 3:31 del Miercoles tarde na Purok 6, Barangay Sinubong, en este ciudad.
Ya puede recubri na posesion de Rojas, quien un watchlisted, sinco diutay paquetes de suspechao shabu que tiene el valor de P6,664, un portamoneda, y P200 markao sen.
Con Francisco, otro un watchlisted tamen, ya aresta na un “buy-bust operation” mga alas 4:44 del Miercoles tarde na Sitio Daap, Barangay Sangali, en este ciudad.
Asegun con Lorenzo, ya confisca na posesion de Francisco un gramo de suspechao shabu que tiene el valor de P6,800 y P200 markao sen.
Con Ustalan, un watchlisted y pajinante de trak, ya aresta na un buy-bust operation mga alas 6:35 del Miercoles denoche na Purok 2, Barangay Recodo, en este ciudad.
Ya puede recubri na posesion de Ustalan suspechao shabu que tiene el valor de P2,380, un portamoneda, y P200 markao sen.
Asegun con Lorenzo, con Ganih quien un watchlisted tamen, ya aresta mga alas 10:10 del Miercoles denoche na Paseo de Johnston, Barangay Canelar, en este ciudad.
Si Lorenzo ya habla, ya puede recubri na posesion de Ganih, quien un vendedor de pescao, tres gramos de suspechao shau con el valor de P20,400, un monedero (coin purse), y P200 markao sen.
Mga personajes del policia ya aresta con Jakiran, un SLI, na un buy-bust operation mga alas 11:10 del Miercoles denoche na Sitio Asinan, Barangay Kasanyngan, en este ciudad.
Ya confisca na posesion de Jakiran P1,700 valor de suspechao shabu y P200 markao sen.
Asegun con Lorenzo, detenido el mga arestao suspechao en preparacion para el plantada del formal asunto contra canila.
(B. Garcia, photo courtesy of Zamboanga City Police Office)
