El 1st Infantry Division (ID) del Philippine Army ya inicia cambio na liderato del 41st Infantry Battalion (IB), uno del mga batalion bajo mando del 103rd Infantry Brigade base na Lanao del Sur.
Asegun con el 1ID cay ya designa con Tiniente Coronel Victor Victor-Czar Villanueva como el nuevo comandante del 41st Infantry Battalion efectivamente del Agosto 11, este año.
Si Villanueva ya releva con Tiniente Coronel Angestal Angeles, II, quien ya sirvi como comandante del 41IB por un año y dos meses.
Si Major General Antonio Nafarrete, el comandante del 1ID, amo el ya encabesa con el ceremonya del cambio del mando que ya conduci na quartel del 103rd Infantry Brigade na Kampo Ranaw, ciudad de Marawi, provincial del Lanao del Sur.
Si Angeles ya rindi si gratitud con todo mga oficiales del govierno local y otro concierne sector, hasta con el mga oficiales y personajes del 41IB por el suporta ya dale sila conele durante su tiempo como el comandante del battalion.
Si Villanueva ya promete continua el mga legacya ya establisi el mga antes lideres del battalion y ay ase le todo esfuerso para el acomplisimiento del mission del mando. (B. Garcia, photo courtesy of 41IB)