El mga autoridad ya aresta cuatro personas na un operacion contra droga que ya resulta na desmantelada de un cuarto de droga ilegal na ciudad de Zamboanga, asegun con el Philippine Drug Enforcement Agency (PDEA) del Domingo.
El oficina regional del PDEA, ya identifica con el mga arestao suspechao como canda Henry Daniel Soriano, 46, un carpentero; Totoh Jama, 40, un vendedor de pescao; Rosebie Hilacio, 29, sin trabajo; y si Alvin Mark Haili, 34, un vendedor tamen de pescao.
Asegun con el PDEA, con el mga suspechao ya aresta na un operacion de compra busto que ya resulta na desmantelada del un cuarto de droga ilegal mga alas 7:30 del Sabado denoche na Paseo de Puerto Princesa, Barangay Talon-Talon, ciudad de Zamboanga.
Ya confisca durante el operacion de compra busto mas o menos seis gramos de suspechao shabu enpaquetao na 13 termosellada transparent sobrecitos plastico que tiene el valor P41,300, diferente parafernales de droga ilegal, y dinero de compra busto.
Asegun con el PDEA, con el mga arestao suspechao ya detene en preparacion para el plantada del asunto contra canila por violacion del Ley Integral de Drogas Peligrosas de 2002.
Asegun con el PDEA, el operacion de compra busto ya conduci con el suporta del Criminal Investigation and Detection Group, y del Technical Support Company del Regional Mobile Force Battalion 9. (B. Garcia)