Cuatro personas mas buscada el ya aresta el mga autoridad na operaciones de aplicacion de leyes aqui na ciudad, asegun con el policia local del Martes.
El policia local ya nombra con el mga arestao personas mas buscada como el mga siguientes: Ahmed Jimlani, 21 años el edad; Felipe Sta. Rosa, 47; Joey Francisco, 26; y, Ruben Delos Reyes, 54.
Asegun con el policia local, con Jimlani ya aresta na un operacion de aplicacion de ley por medio de servi’r orden de aresto mga alas 12:52 del Martes aga na Barangay Pasonanca, en este ciudad.
Asegun con el policia, si Jimlani tiene pendiente orden de aresto por el crimen de estatutorio abuso carnal sin recomendao piansa que ya dale el un corte local del Febrero 14, 2024.
El policia ya habla, si Jimlani listao como el numero sinco persona mas buscada na jurisdiccion del Zamboanga City Police Station 7 base na sistema de E-Warrant.
Con Sta. Rosa, asegun con el policia, ya aresta mga alas 12:10 del Lunes tarde na Zone 5, Barangay Cawit, en este ciudad.
El policia ya habla, si Sta. Rosa listao como el numero nueve persona mas buscada na jurisdiccion del Zamboanga City Police Station 9 base na sistema E-Warrant.
Asegun con el policia, si Sta. Rosa tiene pendiente orde de aresto por el crimen de actos de lascivia con P180,000 recomendao piansa que ya dale el un corte local del Febrero 14, 2024.
Con Francisco, quien listao como el numero siete persona mas buscada base na sistema de E-Warrant, ya aresta el policia mga alas 5:52 del Lunes tarde na Sitio Pitogo, Barangay Sinunuc, en este ciudad.
Asegun con el policia, si Francisco tiene pendiente orden de aresto por el crimen de cuatro cuentas de actos de lascivia que ya dale el un corte local del Febrero 16, 2024.
Con Delos Reyes, ya aresta el policia mga alas 8:07 del Lunes denoche na Sitio Licopon, Barangay Bunguiao, en este ciudad.
Asegun con el policia, si Delos Reyes listao como el numero dos persona mas buscada na jurisdiccion del Zamboanga City Police Station 3 y tiene pendiente orden de aresto por el crimen de dos cuentas estatutorio abuso carnal sin recomendao piansa que ya dale el un corte local del Febrero 15, 2024. (B. Garcia)