Cuatro personas clasificao como mga “watchlisted” y “high-value individuals (HVI)” el ya aresta y ya confisca valor de P27.5 millon droga na un campaña contra droga ilegal aqui na ciudad, asegun con el policia local del Jueves.
El policia local ya nombra con el mga arestao suspechao como el mga siguientes: Ben Kalbi Basaluddin, 33 años el edad; Wajil Handrang Jala, 38; Nadzmar Elyas Abdul, 38; y, Noralyn Tahil Abdul, 38, el esposa de Nadzmar.
Asegun con Police Colonel Alexander Lorenzo, el Zamboanga City Police Office (ZCPO) Director, con el cuatro suspechao ya aresta na un “buy-bust operation” mga alas 4:44 del Miercoles tarde na Paseo de Acacia, Barangay Calarian, en este ciudad.
Asegun con Lorenzo, con el mga suspechao enseguidas ya aresta despues que ya completa sila el transaction de droga ilegal con un secreta del policia local quien ya pretende como un comprador de droga.
Si Lorenzo ya habla, ya confisca desde con el mga suspechao cuatro bolsa-bolsa de plastic que ta contene cada uno un kilo de suspechao shabu y un paquete de plastic con 50 gramos laman de suspechao shabu con el suma total de cuatro kilos y 50 gramos que tiene el valor de P27,540,000.
Asegun con Lorenzo, ya recubri tamen na posesion del mga suspechao un balutan de 999 pedaso de P1,000 “boodle money” que ya pone insima un verdadero P1,000 como markao dinero.
Asegun con Police Lieutenant Colonel Elmer Solon, el hefe del Criminal Investigation and Detection Management Unit del ZCPO, ya conduci sila el campaña siguiendo el vigilancia na mga ilegal actividades del mga suspechao.
Asegun con Solon, ya detene con el mga suspechao en preparacion para el plantada del asunto por violacion del Comprehensive Dangerous Drugs Act of 2002 contra canila.
(B. Garcia, photo courtesy of ZCPO)
