El Philippine Army ya inicia cambio na liderato del 32nd Infantry Battalion (IB), uno del mga mando del militar designao aqui na Mindanao.
El nuevo instolao comandante del 32IB amo si Tiniente Coronel Edmond Lanzar, quien ya releva con Tiniente Coronel Edward Viteño.
Si Major General Ignatius Patrimonio, el comandante de 11th Infantry Division y Joint Task Force (JTF)-Orion amo el ya encabesa con el ceremonia del cambio de liderato que ya ase del Viernes na quartel del 32IB na Barangay Matalin, Malabang, Lanao Del Sur.
Durante el ceremonia, si Patrimonio ya pone medalla de merito militar y plaque de reconosimiento con Viteño por su buen acomplisimiento que ya contribuji mucho na mision del JTF-Orion.
Si Viteño ya rindi su gratitud con el mando y mga tropa por el notable experiencia suyu como el comandante del batallon.
Mientras tanto, ya expresa si Lanzar su sincero gratitude por el oportunidad que ya dale conele para sirvi como comandante del 32IB.
Na su mensaje, si Patrimonio ya rindi gratitud y ya comenda con Viteño por su excelente liderato.
Si Patrimonio ya desafia con Lanzar para encabesa con el batallon y compli mas del mga mision. (B. Garcia, photo courtesy of 11th Infantry Division)