Total de 32 vendedor de droga, quien voluntariamente ya rendi, el ya completa con el de ila programa de reformacion del Balay Silangan na uno del mga municipios na provincia del Zamboanga del Sur.
El oficina regional del Philippine Drug Enforcement Agency (PDEA) ya anuncia del Viernes cay el mga ya gradua na programa de reformacion estaba na 11 del 30 barrios na municipio de Dumalinao, Zamboanga del Sur.
El mga rendidores de drogas ya gradua na programa de reformacion y ya recivi de ila certifico de finalizacion del Martes, asegun con el PDEA.
“Ya enrola sila na programa de reformacion con el objeto para rectifica de ila comportamientos y atitud para queda sila productivo y ciudadano respetuoso del ley na de ila comunidad,” si Maharani Gadaoni-Tosoc, el director regional del PDEA, ya habla.
Si Gadaoni-Tosoc ya felicita con el 32 graduados, y agradece canila por el de ila compromiso resontrui de ila vida para el bien del de ila comunidad.
Si Gadaoni-Tosoc ya expresa su gratitud con el gobierno del municipio de Dumalinao por el inquebrantable compromiso, suporta y guia que ya queda instrumental en el exito del programa, haciendo un profundo diferencia na vida del mga graduados y de ila familiares.
Mientras tanto, el Alcalde Junaflor Cerilles del Dumalinao, Zamboanga del Sur, ya agradece con el oficina regional del PDEA por el guia y suporta con el programa de reformacion del Balay Silangan na su municipio.
El programa de reformacion que ya esta bajo el 32 rendidores de droga tiene el tema “no déjà con el drogas escribi tu istoria”. (B. Garcia)