Tres mga mal elementos del sociedad el ya muri y otro uno el ya captura el mga autoridad despues de un tirahan na provincia del Sur Cotabato, asegun con el militar del Jueves.
Asegun con el Western Mindanao Command (Westmincom), el tirahan ya socede del Martes na Campo Española, Purok Salol, Barangay Palkan, Polomolok, Sur Cotabato.
El Westmincom nohay mas identifica con el tres muerto mal elementos del sociedad quien ya muri durante el tirahan que ya alcansa un hora y 20 minutos.
Asegun con el Westmincom, antes del tirahan, el mga personajes del policia del Polomolok ya recivi informacion aserca el presencia del mga mal elementos del sociedad na Campo Española.
Asegun con el Westmincom, el mga mal elementos del sociedad ya tira cuando ya columbra sila con el mga pulis y soldao del 5th Special Forces Battalion, quien ya anda chekia con el presencia del mga armao personas na Campo Española.
Un pulis el ya iri mientras tres mal elementos del sociedad el ya muri durante el tirahan, asegun con el Westmincom.
El mga autoridad ya puede tamen captura uno del mga mal elementos del sociedad envuelto na tirahan.
El mga soldao y pulis ya recubri dos rifle carbin y un calibre .45 pistola con mga bala na lugar del tirahan.
Si Tiniente General William Gonzales, el comandante del Westmincom, ya comenda con el mga soldao y pulis cay ya puede sila privini con el mga mal elementos del sociedad hace victima con mga inocente residentes.
Ya dale aseguransa si Gonzales cay el militar hay continua suporta con el policia na mga implementacion de operacion de ley dentro na jurisdiccion del mando. (B. Garcia)