Tres personas el ya aresta y P8.5 millon valor de droga ilegal el ya confisca el mga autoridad na tres separao campaña contra droga ilegal na ciudad de Zamboanga, asegun con el policia del Lunes.
El policia ya nombra con el mga arestao suspechao como canda Yaser Mawing, 26 años el edad y un chufer de kuliglig; Perdausa Harani, 39, un individual de alto valor; y si Celestino Cabang, 34, un trabajante de construccion.
Asegun con el policia, con Mawing ya aresta na un operacion de compra busto mga alas 6:28 del Domingo denoche na un motel na Barangay Canelar, ciudad de Zamboanga.
El policia ya habla, ya confisca na posesion de Mawing 250 gramos de suspechao shabu enpaquetao na sinco termosellada transparente sobrecitos plastico con el valor de P1,700,000, un bolso plastico, 59 pedaso de P1,000 robar dinero o boodle money, y un real P1,000 markao dinero.
Asegun con el policia, con Mawing ya detene na facilidad de detencion del Zamboanga City Police Station (ZCPS) 11 en preparacion para el plantada del caso contra conele.
Asegun con el policia, con Harani ya aresta na un operacion de compra busto mga alas 7:14 del Sabado denoche na Sitio Logoy Grande, Barangay Talon-Talon, ciudad de Zamboanga.
El policia ya habla, ya confisca na posesion de Harani un kilo de suspechao shabu que tiene el valor de P6,800,000, un celpon, 10 balutan de robar dinero que ya pone insima un real P1,000 como markao dinero, y un mochila.
Con el arestao suspechao ya pone bajo’l custodia del ZCPSO 6.
El policia ya habla, con Cabang ya aresta mga alas 10:06 del Sabado denoche, na Sitio Hidden Valley, Barangay Cabatangan, ciudad del Zamboanga.
Asegun con el policia, ya confisca na posesion de Cabang 4.7 gramos de suspechao shabu enpaquetao na dos termosellada transparente sobrecitos plastico que tiene el valor de P31,960, un celpon, y P200 markao dinero.
Con Cabang ya detene na quartel del ZCPS7 en preparacion para el plantada del caso contra conele. (B. Garcia)