Tres personas el ya aresta y P14.6 millon valor de contrabando el ya confisca el mga autoridad na un campaña contra smuggling na provincia del Maguindanao del Norte, asegun con el policia del Martes.
Asegun con el Police Regional Office-Bangsamoro Autonomous Region (PRO-BAR), con el contrabando compuesto de 515 cajon de cigarillo ya confisca del Domingo tarde na Barangay Sarmiento, Parang, Maguindanao del Norte.
El PRO-BAR nohay mas nombra con el tres arestao personas quien compuesto de dos chufer que tiene el edad de 28 y 31 y un 44 años pajinante.
Asegun con el policia, con el 515 cajon de cigarillo ya confisca na dos trak que ya inspecciona sila na carretera del Barangay Sarmiento municipio de Parang del Domingo.
El un trak ta contene 35 cajon de cigarillo con el valor de P940,500 y el otro trak ta contene 480 cajon de cigarillo con el cantidad de P13.6 millon o total de P14.6 millon.
Asegun con el PRO-BAR, con el dos chufer y un pajinante, el dos trak y mga cigarillo ya pone bajo’l custodia del policia na municipio del Parang.
El policia del Parang, Maguindanao del Norte, ya coordina ya con el Buro de Aduana para el propio disposicion del mga cigarillo y plantada del caso contra con el tres arestao personas. (B. Garcia)