Tres mga alto oficiales del Western Mindanao Command (Westmincom) el ya participa na dos dias Curso Ejecutivo del Sistema de Commando de Incidentes o Incident Command System (ICS) Executive Course que ya comensa del Jueves, Agosto 1.
Aquellos quien ya participa y ta representa con el Westmincom na dos dias entreno amo canda Coronel Lambert Jonathan Gesolgon, el Inspector General de Comando; Coronel Emmanuel Cabasan, Jefe del Estado Mayor Comando Unificado; y si Capitan Edwin Ello, el Subjefe del Estado Mayor del Comando Unificado para Asuntos de Reservistas y Jubilados.
El curso ejecutivo del ICS diseñao para del mga ejecutivos, administradores, y mga hechor de policia. El entreno ta introduci conceptos y ta dale un orientacion para del mga altos funcionarios quien ta establece o implementa policia.
El mga topico que hay discuti ta inclui el historia, caracteristicas y principios, y estractura organizativo del ICS.
“Came, de ustedes fuerzas armada, hinde lang envuelto para asegura el seguridad y proteccion del mga hente, pero ta suporta tamen na operaciones de rescate y socorro durante natural y ariticial desastres,” ya habla si Tiniente General William Gonzales, el comandante del Westmincom.
Como el comandante del Westmincom, si Gonzales ya expresa apreciacion con el Oficina de Gestion y Reduccion del Riesgo de Desastres del Ciudad o CDRRMO por facilitar semejante actividad. (B. Garcia)