Total de 2,000 semilia compuesto de narra, palo maria y nato el ya siembra durante el observacion del Dia de Arbor de este dia de Martes aqui na ciudad de Zamboanga.
Asegun con el Oficina de Medio Ambiente y Recursos Natural del Ciudad o OCENR, con el mga semilia ya siembra na sinco hectaria lugar de siembrada na Sitio Brea, Barangay Lumayang, en este ciudad.
Asegun con el OCENR, con el actividad de siembrada ya encabesa el Alcalde John Dalipe que ya comensa despues de un corto programa.
Con el actividad de siembrada de palo ya inicia el gobierno local por medio del OCENR.
El Junio 25 ya declara como el Dia de Arbor del Pilipinas por medio del Proclamacion Number 396.
El Dia de Arbor ta reconoce con el necesidad para promociona un saludable ecosistema por medio de rehabilitacion y reverdecer con el medio ambiente por plantando palo y seimbra ornamental y otro formas de relevante actividades. (B. Garcia)