Dos rebelde New People’s Army (NPA) el ya rindi na otoridad na municipio de Siayan, Zamboanga del Norte, porcausa ta continua tene signifante resulta el campanya del govierno contra insurectos aqui na rehyon.
Asegun con Tiniente Coronel Anshary Pumbaya, el comandante del 44th Infantry Battalion (IB), cay canda Joshua Sango Alima alias Ka Abner y si Analyn Balayong alias Ka Milan ya rindi del Sabado na su mando na Barangay Macasing, Siayan, Zamboanga del Norte.
Asegun con Pumbaya cay canda Alima y Balayong amo mga myembros del bungkao grupo del “Main Regional Guerrilla Unit” del “Western Mindanao Regional Party Committee” del NPA.
Asegun con Pumbaya cay ya decidi rindi canda Alima y Balayong despues del guerra entre mga soldao y mga rebelde NPA na Barangay New Rizal, Sergio Osmeña, Zamboanga del Norte del Agosto 8.
Canda Alima y Balayong ya entrega un riple “baby armalite” y 90 bala cuando ya rindi sila na 44IB.
Asegun con Pumbaya cay ay cuwida sila enbuenamente con el dos rebelde NPA que ya rindi canila. Ay pone tamen canila bajo el consultacion medical para asegura na buen estado de salud canda Alima y Balayong.
Ambos si Alima y Balayong ay recivi beneficio bajo na “Enhanced Comprehensive Local Integration Program” del govierno.
Myentrastanto, si Brigadier General Elmer Suderio, el comandante del 102nd Infantry Brigade, ya expresa su gratitude con Alima y Balaying porcausa ya escuji sila el derecho pasada para bira otravez bajo el poder del ley.
Na mismo tiempo, ta ase llamada si Suderio con el losdemas rebelde NPA para sigi na decision de canda Alima y Balayong para abrasa con el camino de la paz y reconciliacion. (B. Garcia, photo courtesy of 44th Infantry Battalion)