El mga autoridad ya aresta dos personas y ya confisca valor de P16.6 millones contrabando na un campaña contra smuggling na ciudad de Zamboanga, asegun con el policia del Domingo.
El mando regional del policia, o Police Regional Office-9 (PRO-9), nohay mas nombra con el dos arestao personas quien compuesto de 37 y 50 años de edad mga hombre.
Asegun con el policia, con el dos ya aresta y ya confisca con el P16.6 millones smuggled cigarillo mga alas 7 del Jueves aga na pantalan del ciudad de Zamboanga.
El policia ya habla, con el mga smuggled cigarillo ya confisca na un trak ya ase munta na un barco de pasajero y carga que nuevo lang ya llega na pantalan del ciudad de Zamboanga estaba na Jolo, Sulu.
Asegun con el policia, ya confisca durante el campaña contra smuggling 290 cajon de diferentes clase de cigarillo que tiene el valor de P16,617,000.
Con el dos arestao personas ya lleva na Maritime Police Station del ciudad de Zamboanga en preparacion para el plantada de asunto contra canila.
Asegun con el policia, con el trak y cigarillo ya entrega na Buro de Aduana para el propio disposicion. (B. Garcia)