Dos peleao familiares desde Lanao del Sur y Maguindanao del Norte el ya firma acuerdo de paz que finalmente ya termina de ila largo tiempo peleya, asegun con el militar del Domingo.
Asegun con Tiniente Coronel Abel Potutan, el comandante del 64th Infantry Battalion (64IB), el firmada del acuerdo de paz ya conduci del Jueves na Municipal Hall del Kapatagan, Lanao del Sur.
Si Potutan ya identifica con el mga protagonistas como el familia de Macalnas de Balabagan, Lanao del Sur y familia Tago de Barira, Maguindanao del Norte.
Durante el areglo, ambos familiares ya jura na Holy Qur’an y ya firma acuerdo simbolizando de ila dedicacion para avanzar, dejar el pasado atras de ila y trabaja hunto para un futuro pacifico.
Asegun con Potutam, el areglo hinde lang ya termina con el playto del dos familiares, pero amo se el prinicipio del lazos mas fuertes y mayor paz.
Ta servi tamen el areglo como un poderoso recordatorio del importancia de esfuerzo de consolidacion de paz na Lanao del Sur.
El exitoso areglo del playto ya hace possible por medio de esfuerzos del 64IB, unidades del goberno local del Kapatagan y Balabagan, Lanao del Sur, Ministry of Public Order and Safety y mga lideres religiosos.
Asegun con Potutan, hay mantene sila firme de ila dedicacion en el apoyo de paz y desarollo. (B. Garcia)