Dos miembros del grupo de mal elementos del sociedad el ya muri na un tirahan na provincia del Sultan Kudarat, asegun con el militar del Miercoles.
Asegun con Tiniente Coronel Tristan Rey Vallescas, comandante del 7th Infantry Battalion, el tirahan ya socede del Lunes na Barangay Lagandang, Isulan, Sultan Kudarat.
Asegun con Vallescas, el tirahan ya socede despues que el mga miembros del Moro Islamic Liberation Front (MILF) y Moro National Liberation Front (MNLF), ya tira con el mga soldao y pulis quien ta conduci operacion de aplicacion de ley que ya resulta na muerte del dos individuales.
Asegun con Vallescas, ya conduci operacion de aplicacion de ley el mga soldao y pulis para preveni escala el tension y violencia que hay resulta na desplazada del mga residentes del Barangay Lagandang cay ta man guerra el grupo del MILF y MNLF na mencionao lugar.
Despues de tirahan, el tropas del gobierno ya recubri dos rifles Barret, dos rifles M16, un M60 machinegun, un 60-millimeter mortar, un rifle calibre .22, un tubo de M203 y cuantos mga bala.
Asegun con Major General Antonio Nafarrete, el interino comandante del 6ID, el conducida del operacion de aplicacion de ley amo para desarma y aresta con el mga armao grupo quien constatemente ta destorba y ta ase miedo con el comunidad na Barangay Lagandang, Isulan, Sultan Kudarat.
Si Nafarrete ya enfatiza cay nohay ni uno el que mas alto o poderoso con el ley y hay enforza sila con el ley con todo’l armao grupos na jurisdiccon del 6ID.
Asegun con Nafarrete, el enforsada del ley hay inclui hasta el grupos inclinados de paz como el MILF y MNLF. (B. Garcia)