Dos de ranggo rebelde New People’s Army (NPA) y dos siguidores el ya muri na separao tirahan contra con mga soldao na provincia del Zamboanga del Norte, el militar ya reporta del Viernes.
El primer tirahan ya ocuri mga alas 5 del Miercoles tarde na Barangay Wilben, Sergio Osmeña, Zamboanga del Norte.
El tirahan ya ocuri cuando ya conduci ofensiva el 53rd y 97th Infantry Battalions (IB) despues que ya recivi sila informacion cay tiene mga rebelde NPA ta man reunion na Barangay Wilben.
El tirahan ya resulta na muerte de Charlie Hintapa alias Ka Andot, el “team leader” del “Guerrilla Front (GF) Sendong” del NPA.
El mga soldao ya puede recubri na lugar del tirahan mga cosas personal del rebelde NPA, un Granada, y mga capsula de rifle Armalite.
El segundo tirahan ya ocuri mga alas 11 del Jueves aga na Barangay San Jose, na mismo municipio del Sergio Osmeña.
El segundo tiraha ya resulta na muerte del Maria Luz Ranan alias Cherry Teola, el secretaria del GF Sending, y dos siguidores nombrao como canda Jerome Albios alias Ka Raffy y si Mary Ann Nabicis alias Ka Bianca.
Ya recubri mga soldao un rifle M4 na lugar del tirahan.
Si Tiniente Coronel Terrence Ylanan, el comandante del 53IB y Task Unit Terminator, ya expresa su gratitud con el mga vivientes quien ya reporta el presencia del mga rebelde NPA na de ila cada’y cual comunidad.
Si Tiniente Coronel Jimmy Sanz, el comandante del 97IB, ya asegura cay ay trata sila humanamente con el resto del mga rebelde NPA y ay ayuda debolbe canila con el de ila cada’y cual familias.
Si Brigadier General Elmer Suderio, el comandante del 102nd Infantry Brigade, ya comenda con el mga soldao del Task Unit Terminator y ya expresa su condolencia con el mga familias del mga rebelde NPA quien ya muri na dos separao tirahan. (B. Garcia, photo courtesy of 102nd Infantry Brigade)