El mga autoridad ya aresta dos de alto valor personalidad de droga y ya confisca P13.6 millones valor de droga ilegal na un operacion de aplicacion de ley na provincia del Sulu, asegun con el Philippine Drug Enforcement Agency (PDEA) del Domingo.
Si Gil Cesario Castro, el director del PDEA na Bangsamoro Autonomous Region in Muslim Mindanao (BARMM), ya habla el operacion de aplicacion de ley ya conduci por medio de interdiccion na puerto del mar del Sabado na Barangay Tandu Bato, Luuk, Sulu.
Si Castro ya identifica con el mga arestao dos personalidad de droga de alto valor como canda Lala Jamih Halisan alias Ben, 28 años el edad y si Alwinir Kabaran, 20 años.
Si Castro ya habla, ya confisca na posesion de canda Halisan y Kabaran dos kilos de suspechao shabu enpaquetao na 21 termosallada transparente sobrecitos plastico que tiene el valor de P13,600,000, y mga tarjetas de identificacion.
Si Castro ya comenda con el mga operativas quien exitosamente ya previni el intencion del dos arestao suspechao para distribui grande volumen de droga ilegal na BARMM que hay destrosa el mga vidas del mga vivientes del region autonomo.
Con el dos arestao suspechao ya pone bajo’l custodia del policia na municipio del Indanan, Sulu, en preparacion para el plantada del asunto contra canila por violacion del Ley Integral de Drogas Peligrosas de 2002.
El PDEA-BARMM ya conduci con el interdiccion na puerto del mar con el suporta del policia, militar, y National Intelligence Coordinating Agency. (B. Garcia)