Dos bata el ya muri mientras tres otro el ya man hospital despues que ya come sila asao pescao na un barrio costal na provincia de Basilan, asegun con un oficial del Miercoles.
Asegun con Oliver Torres, el jefe del Lamitan City Disaster Risk Reduction and Management Office (CDRRMO), el mga victimas amo mga residentes de Balas, un barrio costal na ciudad de Lamitan.
Dos bata quien tiene el edad de cuatro y siete años el ya muri mga alas 5 y alas 7 del Martes aga, respectivamente, despues que ya gumita y ya cursia.
Tres otros, incluido un 34 de edad nana y su dos otro anak el admitido na hospital na ciudad de Lamitan para el tratamiento medical.
Asegun con Torres, base na informacion ya colecta su oficina, el familia ya sena del Lunes denoche con ulam asao pescao conocido con el mga pescador local como el botete, que grande el posibilidad ta contene venenoso chemical nombrao como el tetrodotoxin.
Asegun el clase de veneno, ta causa rapido paralisis, dificultad resulla y en algunos casos, muerte. (B. Garcia)