Dos personas ya aresta myentras no menos de uno punto tres miliones de pesos valor de suspechao shabu ya confisca maga autoridad na campanya contra droga illegal na provincial de Tawi-Tawi.
Si Coronel Richard Verceles, operations chief of the Area Police Command-Western Mindanao, ya habla cay canda Ridzman Muzarin, treynta’y dos años y si Rohit Abubakar, veinte tres años el edad ya aresta na canila un buy-bust operation maga alas seis y media del Sabado denoche na Barangay Pag-Asa, Bongao, Tawi-Tawi.
Asegun con Verceles cay uno del dos suspechao ya precura pa era escapa pero enseguidas conele ya puede cuji maga operativas del pulisiya.
Si Verceles ya habla cay ya puede recubri na posesion del dos suspechao total de dosientos gramos de suspechao shabu que tiene el valor de un milyon tresientos sesenta mil de pesos, un markao mil peso, y dosientos cuarenta pesos drug money.
Asegun con Verceles con el dos suspechao ya pone bajo el custodiya del pulisiya na municipio de Bongao myentras esperansao planta el formal asunto contra canila por violacion del ley contra droga illegal. (B. Garcia, photo courtesy of Police Regional Office-Bangsamoro Autonomous Region)