Dos antes myembros del grupo Abu Sayyaf na provincia de Sulu el ya recivi ayuda desde con el govierno para puede sila principia un nuevo y progresivo vida.
Asegun con el 11th Infantry Division (ID) cay el dos beneficiaryos del ayuda amo canda Adzmir Makiji Siri del municipio de Talipao y si Aifer Heirala del municipio del Patikul.
Canda Siri y Heirala ya rindi recientamente na govierno cay ta desea sila vivi un pacifico vida hunto con el de ila cada’y cual familya.
Asegun con el 11ID cay cada uno de ila dos ya recivi el suma total ayuda de P65,000 compuesto de P15,000 ayuda financial y P50,000 ayuda de busca lavida.
El dos antes myembros del grupo Abu Sayyaf ya recivi ayuda por medio del programa nombrao como el Enhanced Comprehensive Local Integration Program (E-CLIP) ta implementa el Department of the Interior and Local Government y Ministry of the Interior and Local Government in the Bangsamoro Autonomous Region in Muslim Mindanao.
El Governor Abdusakur Tan amo el ya encabesa con el entregada del ayuda fincial por medio de cheke con el dos antes myembros del grupo Abu Sayyaf na un simple ceremonya del Huwebes. (B. Garcia, photo courtesy of Sulu Provincial Government)