El regimento del operaciones civico-militares o CMO Regiment del Philippine Army ya instola nuevo comandante para guia con el 15th Battalion Operaciones Civico-Militares o 15CMOBn base na provincia del Basilan, asegun con el militar del Viernes.
Asegun con el 4th Civil Relations Group (4CRG), con Tiniente Coronel Gerald John Saldo ya instola como el nuevo comandante de 15CMOBn, reemplazando con Tiniente Coronel Noli Binbinon.
Asegun con el 4CRG, si Brigadier General Benjamin Hao, el comandante de CMO Regiment, amo el ya encabesa con el ceremonia de cambio del mando del Lunes que ya hace na quartel del 101st Infantry Brigade na Barangay Tabiawan, ciudad de Isabela City, el capital del provincia de Basilan.
Si Hao ya regala Medalla de Merito Militar con Binbinon por su efectivo liderato, llevando el potencial y capabilidad del batallion que ya resulta na alto rendimiento y sensible mando suportando con el 11th Infantry Division na Sulu y 101st Infantry Brigade na Basilan en terminos de CMO.
Si Hao ya impulsa con Saldo para continua sustene el ganancia del mando y para esta comitido na promovida de paz y desarollo economico na mga provincial de Sulu y Basilan. (B. Garcia)