Catorse pasajeros el ya iri mientras nohay pasa nada con el chufer del vehiculo na un accidente vehicular aqui na ciudad de Zamboanga, asegun con el policia del Lunes.
Asegun con el policia local, el accidente ya ocuri mga alas 4:30 del Domingo tarde enfrente del Campo General Eduardo Batalla na Cawa-Cawa, Barangay Zone 1, en este ciudad.
Asegun con el policia local, el mga victima compuesto de dies mujeres y cuatro mga hombres.
El de todo joven victima es un mujer que tiene el edad de dos años y el mayor de todo canila tiene el edad de 47 años y un hombre.
Asegun con el policia, el mga victima abordo na un jeep de pasajero que ta maneja si Ronie Tibar, 56 años el edad, que ya man bangga na un pono’y acacia mientras ta viaja para na pueblo desde Barangay Ayala.
Mas del invetigacion ta aparece, ya man bangga el vehiculo na pono’y acacia despues que ya perde control si Tibar con el manibela por causa ya sapa el guia del jeep.
Con el mga victima ya lleba na hospital para el curada medical. (B. Garcia, photo courtesy of RPN DXXX Facebook page)