Trese myembros del Bangsamoro Islamic Freedom Fighters (BIFF) el ya rindi na otoridad amediante el sin descanso ofensiva del fuersa militar encontra canila na Central Mindanao.
Na mismo tiempo, ya entrega tamen el 13 myembros del BIFF mga armas de fuego de alta calibre cuando ya rindi sila del Huwebes na Maguindanao.
El Western Mindanao Command (Westmincom) ya habla del Sabado cay si Tiniente Coronel Francis Balan, el comandante del 6th Mechanized Infantry Battalion, ya presenta con el mga antes myembros del BIFF y de ila mga pusil con Brigadier General Leodevic Guinid, comandante del 1st Brigade Combat Team.
El presentacion del mga antes myembros del BIFF con Guinid ya ase na presencia del mga oficiales del Bangsamoro Autonomous Region in Muslim Mindanao y del mga muncipio na provincia del Maguindanao del Sur y Maguindana del Norte, y pulisiya.
Nohay mas nombra el Westmincom si quien el ya rindi puera lang cay mga siguidores sila del faccion de Karialan y Bungos del BIFF que ta opera na provincia del Maguindanao del Sur y Maguindanao del Norte.
Asegun con el Westmincom el mga pusil ya entrega el 13 “BIFF surrenderers” ta consisti de sinco riple M-14 de “sniper”, dos 60-milimetro mortar, un riple Garand, un calilbre .50 Barret, dos Rocket-Propelled Grenade launchers, un shotgun y un M-1203 grenade launcher.
Myentrastanto, asegun con Tiniente Heneral Roy Galido, el comandante del Westmincom, el rindida del 13 myembros del BIFF es un resulta del buen relacion y confiansa entre el govierno local y sector de seguridad para establisi pacific y progresivo comunidad na Mindanao.
Amediante el buen resulta, asegun con Galido ay continua sila usa diplomatico manera con el participacion del govierno local y otro mga concierne sector para sustene el campanya para elimina con el mga mal elementos del sociedad y otro mga armao grupo. (B. Garcia, photo courtesy of Westmincom PIO)