El Department of Environment and Natural Resources (DENR) hunto con el gobierno del ciudad de Dipolog ya larga 118 anak del Olive Ridley turtuga para na mar, asegun con el DENR del Sabado.
Asegun con el oficina regional de DENR si George Laolao, el hefe del Community Environment and Natural Resources Office (CENRO) na Manukan, Zamboanga del Norte, y Alcalde Darel Dexter Uy del ciudad de Dipolog amo el ya encabesa con el largada del mga anak de turtuga.
Con el dos official ya ayuda del mga empleyado del gobierno del ciudad de Dipolog na largada del mga anak de turtuga del otro semana.
Asegun con el DENR, con el mga juevos de turtuga ya encontra el mga guardia na aplaya del ciudad de Dipolog del Noviembre 27, 2023, que ta indica el presencia del mga turtuga ta pone juevos na mencionao lugar.
Enseguidas mga personajes del CENRO-Manukan ya transferi con el 125 juevos que ya resulta na chucada de 94.4 por ciento del mga juevos.
Asegun con el DENR, el International Union for Conservation of Nature ya clasifica con Olive Ridley clase de turtuga como vulnerable.
El Olive Ridley es uno del tres clase de turtuga que ya pone juevos na canto’y aplaya na mga lugar bajo el jurisdiccion del CENRO-Manukan. (B. Garcia, photo courtesy of CENRO-Manukan)
