Once miembros del grupo de terorista Daulah Islamiyah (DI) el ya rendi na autoridad na provincia del Maguindanao del Sur, asegun con el militar del Lunes.
El Western Mindanao Command (Westmincom) ya habla, el 6th Infantry Battalion (IB) del Army ya facilita con el rendida del 11 miembros del terorista DI del Viernes na Barangay Buayan, Datu Piang, Maguindanao del Sur.
Asegun con el Westmincom, el 11 rendidores amo mga siguidores del grupo de Turaife del DI. Ya entrega sila siete armas de fuego de alta calibre y cuatro pusil de bajo calibre.
El mga pusil que ya rendi el mga 11 DI rendidores ya deposita na quartel del 6IB para el propio disposicion.
Si Tiniente General William Gonzales, el comandante del Westmincom, ya alaba con el 6IB por el continuando esfuerzo para destabilisa con el restante grupo de rebelde na Maguindanao del Sur.
Si Gonzales ya dale tamen el coraje con el restante militantes para bira na poder del ley y comete vivi un harmonioso vida.
Con el mga rendidores hay pone bajo’l program del Agila-Haven del gobierno provincial del Maguindanao del Sur.
El Agila-Haven es un plataforma que ta dale oportunidad con el mga antes rebelde para principia de nuevo y recivi oportunidad de busca la vida y otro ayuda despues del de ila rendida. (B. Garcia)