Total de 106 ciudadanos mayores el ya recivi mas de P1.2 millones ayuda financial del Jueves desde con el gobierno local.
Ese ya vene despues que ta continua el gobierno local el distribucion de ayuda financial con mga octogenarians y nongenarians na diferente barangays na ciudad de Zamboanga.
El octogenarians tiene el edad desde 80 hasta 89 y el nonagenarians edad desde 90 hasta 99 años.
Asegun con el Oficina de Desarollo y Bienestar del Ciudad, o CSWDO, 86 del 106 ciudadanos mayores quien ya recivi ayuda financial del Jueves amo mga octogenarians mientras el 20 mga nonagenarians.
Asegun con el CSWDO, cada uno del 86 octogenarians ya recivi P10,000 ayuda financial y cada uno del nonagenarians ya recivi P20,000 o el suma total de P1,260,000.
Asegun con el CSWDO, el distribucion del ayuda financial del Jueves ya hace na Barangay Guiwan.
El mga personajes del CSWDO ya anda tamen distribui ayuda financial casa-en-casa con aquellos mga beneficiarios ta enfrenta desafios fisicamente.
El dalida de ayuda financial con mga ciudadanos mayores es de conformidad con el provisiones del Ordinasa 539 ciuda de Zamboanga.
El distribucion del ayuda financial del Jueves na Barangay Guiwan ya encabesa el Alcalde John Dalipe hunto con mga personajes del CSWDO. (B. Garcia)