El Departamento de Trabajo y Empleyo (DOLE) ya distribuhi mas de P3 milyones valor de arimienta de busca lavida para omenta el encontrada del 102 siembrador y fescador na municipio del Kumalarang na provincia del Zamboanga del Sur.
Asegun con Miraflor Casanes, el hefe del oficina del DOLE na Zamboanga del Sur, cay el distribucion del mga arimienta de busca lavida y baroto con el 102 beneficiaryo amo para mejora de ila lavida y lleva progreso na sector del agricultura na municipio del Kumalarang.
Asegun con Casanes, el distribucion del mga arimienta amo un manera para realiza el sueño y aspiracion del mga siembrador y fescador del Kumalarang town.
El alcalde Ruel Molina ya extende su palabras de comendacion con Albert Gutib, el director rehyonal del DOLE, por el suporta y dedicacion para mejora mas el bienestar del mga vivientes del mencionao municipio.
Na un mensaje, si Gutib ya habla cay el esfuerso de colaboracion entre el DOLE y govierno municipal del Kumalarang ta sirvi como un testimonia del compromiso para mejora el sector de agricultura y mejora la vida del mga siembrador y fescador. (B. Garcia, photo courtesy of DOLE-9)