El Public Employment Service Office (PESO) ya anuncia cay 102 applicantes el “hired on the spot (HOTS)” durante el “Linggo ng Kabataan job fair” aqui na ciudad de Zamboanga.
El job fair ya conduci el PESO, federacion del Sangguniang Kabataan y Departmento de Trabajo y Empleyo del Martes na KCC Mall de Zamboanga.
Asegun con el PESO cay aquellos HOTS enseguidas ya principia trabaja na de ila cada’y cual agencias.
Asegun con el PESO tiene tamen 17 applicantes el “near-hires”, que quire decir el mga aplicantes necesita pa somete omento documentos y omento entrevista y saca examen para puede principa trabaja.
Total de 18 companiya para empleyo local y na otra pais el ya participa na job fair con el ofresimiento de 3,104 vacante trabajo.
Asegun con el PESO cay 783 el ya qualifica para trabajo local y na otra pais na total del 1,021 mga aplicantes el ya esta bajo na entrevista.
Asegun con el Alcalde John Dalipe cay el conducida del job fair amo uno iniciativa del govierno para dale oportunidad de empleyo con el mga nuevo graduao, sector de los jovenes y para con aquellos quien ya perde trabajo durante el pandemia. (B. Garcia, photo courtesy of Public Employment Service Office)