Un persona ta enfrenta el asunto na jusgado el ya aresta mga autoridad aqui na ciudad del Zamboanga, asegun con el policia local del Sabado.
Asegun con Police Major Ramon Aquiatan, Jr., el hefe del Zamboanga City Police Station 10 (ZCPS10), con el arestao acusao ya conose como si Quinie Amil, 35 años el edad y residente de Barangay Ayala, en este ciudad.
Asegun con Aquiatan con Amil ya aresta mga alas 3:50 del Viernes tarde na Purok 4, Barangay Labuan, en este ciudad.
Si Aquiatan ya habla cay si Amil tiene pendiente order de aresto por el asunto de “estafa” violacion del “Batas Pambansa Bilang 22” que ya dale el un tribunal del ciudad de Zamboanga del Octubre 7, 2022.
El tribunal ya recomenda el piansa de P1,666 para el asunto de estafa y P1,000 para el asunto de Batas Pambansa Bilang 22.
El arestao acusao ta esta bajo na temporario custodia del ZCPS10. (B. Garcia, photo courtesy of Zamboanga City Police Station 10)