Un persona el ya aresta el mga autoridad por violacion del ley contra juego ilegal na provincia del Lanao del Sur, asegun con el policia del Viernes.
El policia ya nombra con el arestao suspechao como si Mahdi Gaus, con quien ya aresta na un operacion de aplicacion de ley mga alas 5:30 del Jueves tarde na Barangay Beruar, Tamparan, Lanao del Sur.
Asegun con el policia, con Gaus ya aresta un atrapamiento (entrapment) mientras ta colecta le tayada para el un huego ilegal conosido como el “swertres”.
Asegun con el policia, ya puede recubri na posesion de Gaus mga cosas ta usa na colectada de tayada como boligrafo, recivo de tayada, tip de swertres, y P200 dinero de tayada de diferente denominacion.
Con Gaus y el mga confiscao evidencia ya lleva na quartel del policia de Tamparan para el documentacion y propio disposicion en preparacion para el plantada del formal asunto contra conele.
Mientras tanto, si Coronel Robert Daculan, el director del policia na Lanao del Sur, ya comenda con el mga personajes del policia por el buen exito del campaña contra juego ilegal que ya resulta na aresto del suspechao. (B. Garcia, photo courtesy of Lanao del Norte Police Provincial Office)