Uno el muerto myentras tres ya iri na bangga-an de dos motorsiclo na Barangay Patalon na costa weste del ciudad de Zamboanga.
Asegun con Police Major Ramon Aquiatan, el hefe del Zamboanga City Police Station 10 (ZCPS10), cay el accidente ya ocuri mga alas 2:05 Sabado tarde na Sitio Agrarian, Zone 5, Barangay Patalon, este ciudad.
Si Aquiatan ya nombra con el muerto victima como si Jonathan Graciano, 46 años el edad y chuffer del uno del dos motorsiclo envuelto na accidente.
El mga irido victima ya nombra si Aquiatan como el ancas de Graciano si Ronald Benson, 40 años el edad; Edgar Dejucos, 39 años, el chuffer de otro motorsiclo; y si Sonny Laping, 30, años y el ancas de Dejucos.
Base na investigacion, cay ya man bangga-an el dos motorsiclo despues que crosa si Dejucos para na otro lao del camino myentras ta viaja sila de Laping para na direccion de Barangay Labuan.
Durante del accidente, ta viaja canda Graciano y Benson para na direccion del pueblo.
Asegun con Aquiatan alegaomente buracho si Dejucos y bien corre ta maneja.
Asegun con Aquiatan ya muri si Graciano na lugar del accidente myentras el otro tres mga victima admitido na Labuan General Hospital. (B. Garcia, photo courtesy of ZCPS10)