El persona el ya muri y dos otros el intacto na un accidente vehicular envuelto un motorciclo y jeep de pasajero na costa este del ciudad, asegun con el policia local del Martes.
Asegun con el policia local, el incidente ya ocuri mga ala 1:40 del Lunes tarde na carretera del Maria Clara Lorenzo Lobregat, Barangay Boalan, ocho kilometros este del ciudad.
El policia local ya nombra con el fatalidad como si Casandra Abdulla, 45 años el edad y residente del Paseo de Martha, Barangay Sta. Catalina, en este ciudad.
Asegun con el policia local, intacto canda Muhaimin Araluddin, 56 años el edad, el chufer del motorciclo, y si Adilraqib Saykuna, 32, el chufer del jeep de pasajero.
Base na investigacion, ya man bangga el jeep de pasajero que ta maneja si Saykuna cuando ya crosa el motorciclo na camino para na direccion de este que ta maneja si Araluddin y ta sigi ancas su esposa, si Abdulla.
Asegun con el policia local, ya cay na motorciclo si Abdulla y ya sufri irida na diferente partes del su cuerpo por causa del impacto del bangga.
Estaba canda Araluddin y Adbdulla na un tienda de hierro y el jeep ta viaja para na pueblo durante el incidente.
Con Abdulla ya lleva na hospital pero ya informa si Araluddin con el policia cay ya despidi su esposa mientras bajo’l curada medical. (B. Garcia)