Un persona ya muri y otro ya iri na un incidente de tiro na un establisimiento de bebida aqui na ciudad de Zamboanga.
Si Police Colonel Alexander Lorenzo, el Zamboanga City Police Office (ZCPO) director, ya nombra con el muerto victima como si Geoffrey Saracho, 42 años el edad.
Con el irido victima ya conose como si Gappal Addang, 27 años el edad.
Asegun con Lorenzo el incidente ya ocuri mga alas 2:45 Lunes aga na “White Rabbit Bar and Disco House”, na Governor Camins Avenue, Barangay Canelar, este ciudad.
Base na testimonya de Sherhan Hassan, el tiketero del establisimiento, cay antes del incidente, tiene tres mga buracho personas el ya entra na “White Rabbit Bar and Disco House”, sin pagar tiket.
Asegun ya tene un comocion cuando uno del tres ya ase kodo con el tiketero quien ya atraka na de ila mesa para cobra pago de tiket.
Enseguidas tamen el manager del “disco house”, si Carlo Glenn Loberata, ya puede pacifica el comocion.
Despues del comocion, el tres buracho personas ya sale apuera y ya saka pusil na de ila coche.
Ya empsesa estos tira de ila pusil y ya tupa el tiro con Addang y Saracho cuando ya bira sila adentro na establisimiento.
El mga suspechao ya munta na de ila coche y despuese ya enderesa para na direccion del pueblo.
Si Dr. Rodelin Agbulos, el “medical director rescue 2” ya declara muerto con Saracho na lugar del incidente. Con Saracho ya tupa el bala na sup echo.
Ya recubri mga pulis na lugar del incidente nueve capsula y dos punta del bala de calibre .45 pistola.
El Zamboanga City Police Station 11 (ZCPS11) ta continua investiga para determina si quien el mga echor del incidente. (B. Garcia, photo courtesy of ZCPO)