Un chufer el ya iri myentras otro uno nohay pasa nada cuando ya accidenta el dos motorsiclo na Maria Clara Lorenzo Lobregat (MCLL) highway aqui na ciudad del Zamboanga.
El Zamboanga City Police Station 2 (ZCPS2) ya nombra con el irido victima como si Marvin Araneta, 29 años el edad y residente de Barangay Latuan, este ciudad.
El otro chufer, si Arnold Gregio, 44 años el edad y residente de Barangay Licomo, nohay pasa nada.
Asegun con el ZCPS2 cay el incidente ya ocuri na MCLL highway na Barangay Quiniput, este ciudad mga ala 1:30 del Huwebes tarde.
Base na investigacion del ZCPS2 cay antes del incidente, ambos canda Araneta y Gregorio ta maneja motorsiclo y ta viaja na un direccion.
Cuando ya llega na Quiniput, ya man chagis si Araneta con Gregorio siendo nohay le puede nota cay pa birada este na lao isquierda.
Asegun cay bien corre ta maneja su motorsiclo si Araneta durante akel tiempo.
Ya kebra el isquierda pierna de Araneta cuando ya man bangga le na un poste de cemento despues man chagis con Gregorio.
Con Araneta ya lleva para na ospital na Barangay Quiniput myentras nohay pasa nada con Gregorio cay ya puede le salta desde’l su motorsiclo durante el incidente. (B. Garcia, photo courtesy of ZCPS2)