Un suspechao el ya aresta y ya confisca valor de P340,000 droga ilegal el mga autoridad na un campaña contra droga na Zamboanga del Sur, asegun con el Philippine Drug Enforcement Agency (PDEA) del Lunes.
EL oficina regional del PDEA ya nombra con el arestao suspechao como si Rechie Saavedra, 35 años el edad y residente del Purok 3, Barangay Magahis, Dimataling, Zamboanga del Sur.
Asegun con el PDEA, con Saavedra ya aresta na un “buy-bust operation” mga alas 10:10 del Domingo denoche na Purok Imelda, Barangay Poblacion, San Miguel, Zamboanga del Sur.
El PDEA ya habla, ya confisca na posesion de Saavedra 50 gramos de suspechao shabu enpaquetao na un supot de plastic que tiene el valor de P340,000, un celpon, un motorciclo, dos balutan de “boodle money” que ya pone insima un verdadero P1,000 como markao dinero, un sobre y un lighter.
Asegun con el PDEA, un asunto por violacion del Comprehensive Dangerous Drugs Act of 2002 ay planta na corte contra con el arestao suspechao.
El aresto de Saavedra ya hace el mga agentes del PDEA con el suporta del policia na municipio del San Miguel, Zamboanga del Sur. (B. Garcia, photo courtesy of PDEA-9)