Un persona envuelto na vendida de droga ilegal el ya aresta y valor de P141,440 suspechao shabu el ya confisca mga autoridad na provincial del Lanao del Sur, asegun con el policia del Miercoles.
Asegun con Police Colonel Robert Daculan, el Lanao del Sur Police Provincial Office director, con el arestao suspechao ya conose como si Cairoding Bangcorong.
Asegun con Daculan con Bangcorong ya aresta na un “buy-bust operation” mga alas 4 del Martes tarde na Barangay Sugod Proper, ciudad de Marawi, provincia del Lanao del Sur.
Si Daculan ya habla cay ya puede confisca na posesion de Bangcorong 20.8 gramos de suspechao shabu que tiene el valor de P141,400, un motorsiclo, un celpon, licensia de chufer, y markao sen.
Con Bangcorong ya detene na quartel del policia na ciudad de Marawi en preparacion para el formal plantada del asunto contra con el suspechao. (B. Garcia, photo courtesy of Lanao del Sur Police Provincial Office)
