Ya aresta mga pulis con un “watch-listed” suspechao na campanya contra droga ilegal na Barangay Tugbungan, aqui na ciudad del Zamboanga.
Si Police Major Alvin Lepiten, el hefe del Zamboanga City Police Station 8 (ZCPS8), ya nombra con el arestao suspechao como si Ranz Cambaya Sangkula alias Adi, 31 años del edad y residente de Isla Berde, Barangay Sta. Catalina, este ciudad.
Asegun con Lepiten cay con Sangkula ya aresta na un “buy-bust operation” na Tropical Drive, Barangay Tugbungan, este ciudad mga alas 8:54 del tarde del Huwebes.
Asegun con Lepiten cay ya puede recubri na posesion de Sangkula suspechao shabu que tiene el cantidad de P5,000 y P200 markao sen compuesto de dos pedaso de P100.
Detenido ahora si Sangkula na ZCPS8 en preparacion para el plantada del asunto encontra con ele na jusgado. (B. Garcia, photo courtesy of ZCPS8)