Un alto lider del Bangsamoro Islamic Freedom Fighters (BIFF)-Karialan Faction y 11 siguidores el ya muri mientras siete soldao el ya iri na un tirahan na provincia del Maguindanao del Sur, asegun con el militar del Miercoles.
Asegun con General Jose Vladimir Cagara, el comandante del 1st Brigade Combat Team (1BCT), el tirahan ya ocuri mga alas 7:30 del Lunes aga na Sitio Pendililang, Barangay Kitango, Datu Saudi Ampatuan, Maguindanao del Sur.
Asegun con Cagara, ya socede el tirahan cuando el mga soldoa ya columbra con 15 bien armao miembros del BIFF mientras ta conduci un operacion de combate na Barangay Kitango.
Si Cagara ya identifica con el muerto lider del BIFF como si Mohiden Animbang alias Karialan, el lider del BIFF-Karialan Faction.
Asegun con Cagara, ya muri tamen si Saga Animbang, el hefe del operacion del BIFF-Karialan Faction y hermano de Mohiden.
Asegun con Cagara, ta precura pa sila determina el mga identificacion del 10 muerto siguidores del BIFF, quien ya muri hunto con el man hermano Animbang durante el ofensiva del fuersa militar.
Asegun con Cagara, ya confisca sila 12 armas de fuego de alta calibre que ta inclui sinco rifles M16A1, tres rifles M14, two rifles M653, un rifle M4 y un pusil de alta calibre.
Nohay mas identifica si Cagara con el siete soldao quien ya iri durante el fuerte tirahan contra con el BIFF-Karialan Faction.
Fuera con el mga soldao del 1BCT, envuelto tamen na operacion de combate el mga tropa del 1st Scout Ranger Company bajo del 1st Scout Ranger Battalion y Scout Platoon 92 y 99. (B. Garcia)
