Subling mubisita sa Sarangani Province sa ikatulo na ka magkasunod nga tuig ang mga kadagkuan sa World Bank aron bisitahon ang ilang mga proyekto nga gibutang sa probinsya, hilabi na ang nagpadayon nga pagpasemento sa mga nag-unang provincial road sa kabukiran.
Kini ang gikumpirma mismo nila Department of Agriculture XII Regional Director Arlan Mangelen ug Mr. Noel Provido, ang deputy program director sa programang PRDP kon Philippine Rural Development Program-Mindanao Support Office (PRDP-MSO), sa ilang pag-adto bag-uhay lang sa Kapitolyo sa Sarangani.
Ang World Bank ang international financial institution nga maoy funding agency sa programang PRDP sa Pilipinas. Hinungdan nga dako kining gipasalamatan ni Governor Steve Chiongbian Solon.
Gani, sa Sarangani Province, unom (6) ka tuig ng naga-ayuda ang PRDP sa padayong pagpasemento sa mga major farm-to-market road naka-benipisyo kasagaran ang mga kaigsoonang lumad nga nanimuyo sa lagyong lugar. Wala pay labot dinhi ang KALSADA project sa DILG pinaagi sa CMGP program kon Conditional Matching Grant to Provinces nga anaa usab padayong naka-alalay.
Gawas sa pagpasemento sa mga nag-unang provincial road sa kabukiran sa Sarangani Province sa superbisyon sa Sarangani Provincial Engineering Office, anaa pud ang PRDP nagatabang sa pagpabarog og mga planta ug sa pagpalambo sa produktong pang-agrikultura, sama sa abaca fiber, virgin coconut oil, cacao/tablea ug tibuok lubi kaabag ang mga kahugpungan sa mag-uuma.
Sa talaan sa Sarangani Provincial Planning and Development Office, hapit P900 Milyon ka pesos ang nabubo nga pondo sa PRDP sa Sarangani. Gibutyag ni Engineer Gerald Faciol, ang assistant provincial administrator, nga laing dungog na usab sa Sarangani Province ug sa pamunuan ni Governor Solon nga subling bisitahan sunod bulan sa mga kadagkuan sa World Bank. Nagpasabot lamang matud pa nga naka-uyon ang taga-World Bank sa pagpatuman sa mga proyekto basi sa international standard sa World Bank.
(Provincial Information Office – Sarangani)