31.1 C
Manila
Saturday, April 13, 2024

UniCity Management Nagsuyat Kan Mayor Estong Matugas, Nangajo Pasaylo Sa Ila Nahimo Na Kalapasan

- Advertisement -
Nagpadaya nan suyat an Uni City Management ngadto kan Surigao City Mayor Ernesto U. Matugas, Jr. pinetsahan Oktubre 21, 2020, pinirmahan ni Mr. Michael Lee, an Store Manager.
Unod nan suyat an pagpangajo nan pasaylo sa matud pa ija sajop na desisyon pagbutang nan display para sa bargain sale sa gawas nan ila tindahan nan jadton Oktubre 19, 2020 na tagdugok nan mahamok na tawo.
Matud pa ni Mr. Lee sa ija suyat na an Uni City General Merchandise nagtuman gajod sa mga regulasyon, labi na sa mga protocols na tagplastar para sa inin kahimtang sa CoViD-19, jadto ra lamang na higayon na nasajop an ija desisyon.
Dugang pa ni Mr. Lee na may higayon pa gani na nagpahimutang sila nan pagmisting sa entrada nan tindahan, isip decontaminasyon sa mga costumer, pero ila taghunong human na tagtawag an ila atensyon nan City Health Office tungod sa posible na dili kun marajaw na epekto sa lawas nan tawo.
Naghangyo isab si Mr. Michael Lee sa ija suyat na unta mapasaylo sila nan kagamhanang lokal, marekonsidera an desisyon pagsuspenso sa Business Permit, sanan tugutan sila, an Uni City na maka-operate balik, dakan isab makabalik na sa trabaho an mga trabahante o mga empleyado nan tindahan. (Jhino B. Parrucho, Ronda 10 RPN DXKS Surigao)
- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -