Cagayan de Oro – MALAMPUSONG gipahigayon sa Community Affairs Office – City Volunteerism and Active Citizenship ang ikaduhang hugna nga panagtapok sa mga volunteerism focal persons (VFPs) sa matag buhatan sa city hall, Marso 5 ning tuig.
Atol sa maong panagtigom, gi-edukar ang mga VFPs sa nagkadaiyang mga topiko kabahin sa persons with disability sensitivity, gender ug cultural sensitivity.
Nakita sa mga VFPs ang kamahinungdanon sa maong learning sessions sa pagpalawom sa ilang pagsabot sa nagkadaiyang sektor sa katilingban nga sagad usab nakasinati og pag-yaga-yaga ug pagbiay-biay gumikan sa ilang kasalik-an sa panglawas ug uban pang kalahian.
Dumduman ang pagmugna og volunteerism focal persons usa lang sa mga paningkamot sa kagamhanang lokal sa Cagayan de Oro sa pagdumala ni Mayor Rolando ‘Klarex’ Uy, aron mapabiling buhi ug lagsik ang diwa sa bolunteerismo ug bayanihan sa matag buhatan.