Gi-awhag ni Davao City Archbishop Romulo G. Valles ang tanang mga volunteers labi na kadtong naa sa medical field nga makig-alayon kanila alang sa pagpahimutang og vaccination center sa matag Parokya dinhi sa siyudad. Matud ni Archbishop Valles, kaniadto pa, abli ang Archdiocese of Davao sa mga posibleng matabang niini ngadto sa gobyerno sa kampanya nga mas daghan pa ang mabakunan kontra covid-19.
Nakig-alayon na usab ang Archdiocese ngadto sa Davao City Health Office ug sa vaccination team sa mga Parokya alang sa PARISH-BASED VACCINATION CENTER. Sa milabay nga July 31, 2021, malampuson nga gipahigayon sa Sacred Heart of Jesus Parish sa Bo. Obrero ning siyudad ang pagbutang og vaccination center sa parokya diin 686 ka indibidwal ang nabakunahan niadtong adlawa.
Ang matag Parokya gidasig sa pag-andam sama sa vaccination area, pag-awhag sa mga medical volunteers, lakip na ang ubang volunteers alang sa ushering, registration, validation screening ug counselling, mga pagkaon ug mga gadgets aron gamiton sa actual nga vaccination. Dako ang panghinaot ni Archbishop Romulo Valles sa mga deboto, mga parishioners ug mga benefactors nga mu-abag sa ilang Parokya aron mahimong malampuson ang tinguha nila nga mabakunahan ang tanang katawhan.
(Source: Archdiocese of Davao)
