Aron pagtabang ug pagsuporta sa mga taga ZamboNorte may kalabutan na sa pagtaas sa presyo sa sibuyas bombay, ang Office of the Provincial Agriculturist (OPAG) mihimo sa inisyatiba pinaagi sa Zamboanga del Norte Agricultural Extension (ZNAg) Program.
Kini mihatag ngadto sa Upper Piao, Farmers Association sa Sindangan og 400 gramos nga liso sa sibuyas bombay niadtong Marso 31, niining tuiga.
Ang OPAG pinaagi ni Provincial Agriculturist Ms. Maybel Bustaliño mihimo’g aksyon aron ang katawhan ning probinsya mahatagan ug supply sa sibuyas bombay sa hamubo nga presyo.
Si Mr. Cirilo Maata, Assistant Coordinator sa ZNAg Program sa OPAG ug Ms. Carmen Putian, Farm Foreman sa nasangpit nga buhatan, mipasabot nga bisan paman sa unsa ka sinsitibo ug atimanunon pag-ayo ang sibuyas bombay, gipaningkamutan ug gitun-an pag-ayo nila kini nga magmalampuson aron adunay maani sa umaabot nga panahon.
Sa nasayran nga sa 400 gramos nga liso sa sibuyas bombay, adunay 1,000 square meters ang luna sa yuta nga matamnan niini.
Gibana-bana kini nga moani sa 900 ngadto sa 1,000 kilos karong umaabot bulan sa Hunyo.
(Source: Provincial Information Center Zanorte Facebook page)