Cebu City – Gihukmang sad-an sa korte ang upat ka babaye nga nag-atubang og kasong online sexual exploitation sa mga menor de edad pinaagi sa internet.
Ang Branch 70 sa Regional Trial Court sa dakbayan sa Lapu-Lapu mikombikto sa upat ka akusado sa duha ka managlahing kaso nga may labot sa online sexual exploitation sa kabataan.
Segun sa press statement sa IJM o International Justice Mission, si Presiding Judge Christine Muga-Abad mipakanaog sa hukom sa duha ka kaso niadtong Peb. 24.
Midugang ang IJM nga ang tanang akusado parehong miduso og buwag nga plea bargaining arrangements.
Gipasabot sa IJM nga ang plea bargaining namatud-ang usa ka epektibong estratehiya paghatag og hustisya sa mga biktima sa online sexual exploitation kay ang upat ka babaye miangkon man sa duha ka salaod.
Ang unang kaso naglambigit sa tulo ka suspetsado nga nadakpan sa Women and Children Protection Center Visayas Field Unit (WCPC-VFU) niadtong Marso 2019.
Ang mga awtoridad miluwas sa siyam ka menor de edad samtang ang mga akusado gikeha og kalapasan sa Qualified Trafficking in Persons Act o Republic Act 10364 ug kalapasan sa Cybercrime Prevention Act of 2012 o Republic Act 10175. (Jhon Tadlip/JTY)
(Source: International Justice Mission, photo courtesy by Jay Dilan)