Cebu City – Dugang healthcare workers sa VSMMC o Vicente Sotto Memorial Medical Center ang naengganyo sa pagpabakuna sa Sinovac nga gikan sa China.
Atol sa press briefing, si Dr. Gerardo Aquino, Jr., pangu sa VSMMC, mianunsyo nga miabot na ug 1,245 ka healthcare workers ang nalista nga magpa-immunize sa CoronaVac.
Suma pa ni Aquino, hangtod sa Marso 3, nahimong 1,245 gikan sa 768 ang mipadayag og interes pagdawat sa bakuna.
Subay niini, naglaom ang opisyal nga aduna pay dugang moapil sa inoculation.
Segun sa record, 3,000 ka healthcare workers ang nag-alagad sa VSMMC, ang labing dakong referral hospital sa Covid 19 sa Central Visayas.
Sila ang unang makadawat sa COVID-19 vaccines sa Cebu ug sa tibuok region.
Si Aquino ang mangu sa ceremonial rollout ug unang medical front-liner sa VSMMC nga gidapatan sa CoronaVac.
Matod ni Aquino, mahinamon siyang midawat sa bakuna ug miagni sa iyang mga sakop pag-apil sa COVID-19 vaccine drive sa gobyerno. (Jhon Tadlip/JTY)
(News & photo courtesy of Department of Health 7)