Iriga City — Nawalat sa baybayon siring kaini pigladawan an kinaabtan kan sarong lalaki na nabayaan kan mga pag-iriba makalihis na magtiripwasan kan sakyadahon nin mga otoridad an tupadahan sa banwaan na ini.
Pasado alas-9 nin aga suodma, October 18, 2020, sarong concerned citizen an nagpa-abot nin sumbong sa hepatura kan Minalabac PNP na may nangyayaring ilegal na pabulang o patupada sa Zone 5, Brgy. Mataoroc, Minalabac, Camarines Sur.
Tulos na nagpadara nin mga operatiba si PMAJ. JIM VARGAS JEREMIAS, Acting Chief of Police kan Minalabac MPS sa nasambit na lugar tangani ng maberipikar an impormasyon.
Sa pag-imbestigar kan grupo na pinagenotan ni PLT. ISRAEL L. BANAAG, DCOP, asin kan intel operatives kaibanan si PMSg. Rodel Marabella, nakumpirmar an nasambit na report.
Sa guinibong pagsakyada poco mas o menos alas-11:30 nin aga, nagkakurobanan an mga parabulang asin tulos na nagtiripwasan. Alagad, nabayaan asin dae na nakapangalasag pa an suspek na si Eric Baluca y Escoro, 30-anyos, may agom, paraoma asin residente kan Zone-5, Sitio Bingkay Brgy. Baliuag Nuevo, Minalabac, Camarines Sur na natakma asin tulos niramalan kan mga otoridad.
Nakumpiskar sa suspek an sarong pambulang na manok, sarong tari asin kantidad ₱ 400.00 na pusta sa tupada.
Sa pagrekesa kan mga operatiba sa lugar, nakadukay an mga ini nin saro pang pambulang na manok.
Si Baluca, kaibanan an mga nakumpiskar na manok asin iba pang ebidensya, tulos na dinara sa hepatura kan Minalabac PNP kun saen pinagpipreparar na an kasong pagbalgar sa Presidential Decree 449 (Illegal Cockfigthing) kontra sa nasambit na suspek.
(Source: Minalabac PNP)
